me hets se gwehlt und will se ha
doch nimmt si d Wahl au wirklich a
sy weiss nit rächt muess sich berote
es wär zwar guet für d Frauequote
denn seit si zu mir gän dr Säge
s Schlumpfinchen duet eus d Helge träge
dr Blocher isch nümm Bundesrot
er chauft jetzt Firme wo marode
uf em Ranze sin und nit rendiere
und duet die denn knallhart Saniere
jetzt düen si und dasch s Bittere
uf dr Stadtverwaltig zittere
eus vierne hets fascht öppis geh
was uff em Bahnhof z Lieschtel als duesch gseh
drei Pircings do eis in dr Zunge
e Büchse Bier und eis für d Lunge
es chunnt no schlimmer müend nur warte
das si erscht die vom Chindergarte
d Ester Maag chunnt im Stritewage
für ihri Wahl cho dankschön sage
wie dr Ben Hur im Kino Film
eus chunnt e bessere Film in Sinn
s Transportgrät währ für sie au flotter
nämllich das vom Harry Potter
e Gassefäger glaubsch es nit
sy die gröschte Schwizer Hit
Krokus Gotthard Züri West
vom ganze Land nur s aller Bescht
dr Polo mit intakter Läber
es singt au no dr Peter Räber
mit Coolmän Peter Steiner selig
und der Liebi wo für Ewig
vom Turnherr duesch nur d Schnurre gseh
vo dr Jordi numme s Dekollte
dr Gölle duet sy Schwan doch singe
dr Schachersepp jä dä duet gwinne
die Musig goht dur Bei und Mark
jä Schwyzer Musig isch sackstark
drum isch es schad machsch fascht e chötzi
hole d Wildsäu doch dä DeeJey Ötzi
d Frisur die isch total zersaut
es gseht so uus das eine graust
d Jacke schräg und s Hemmli duss
zum luege isch es nit e gnuss
trotz neue Chleider sy die drei
no immer glich bi dr Stadtpolizei
hesch Ehrgiz und e starke Wille
duesch alles geh di richtig trille
duesch nie uf geh chunsch immer wieder
chansch alles erreiche bisch e Sieger
doch mängisch duets Usnahme geh
das wird dr Fröhlich bi de Wahle gseh
zu hunderte hei sy inne welle
alles duet vo ihm verzelle
will er so herzig und so fyn
sone süesse und so chlinn
nit dr Knut dä wie si gseh
nei mi am Rotstab Cabaret