Kunschtdünger in grosse Mänge
gheie si uf d Abfahrt z Wänge
d Pischte hebt, doch denn gits Chlage
d Oeschtricher wie das nit wage
hei biologisch schlau und grisse
am Hahnekamm uf d Piste gschisse
d Kasernestroos die wird saniert
d Parkuhre dorum abmontiert
und ohni Parkuhr sisch nit glatt
darfsch nit parkiere das seit Stadt
typisch duet das d Stadt so länke
ohni Hirn darfsch au nit dänke
Swissair Grounding vor em Richter
alli mache unschulds Gsichter
niemer will nur s gringschte sage
keine duet e Ussag wage
kei Mucks kei Ton het me vernoh
wenn mir hei chömme ischs nie eso
Trix und Flix die beide Clöön
die Näme finde mir nit schön
me setti doch vo jedem Land
e Name ne wo dört bekannt
für eus dr Tell denn dä het Charme
dür Oeschtrich dr brun mit em stiffe Arm
statt z überlege und z studiere
duet me s eifach so montiere
churz drufabe fangts a rüttle
au eus duets total duure schüttle
mir hei nit uffpasst se nit gseh
die gschisse Schwelle am Hintersee
dir heits im Fernseh au scho gseh
s duet immer meh Quisfroge geh
mit Antwort A und Antwort B
wirklich schwer weisch nit was neh
zum Byschbil wär darf nümm in Engel
A dr Miesch B bösi Bängel
was isch dämlich und sehr doof
A d Paris Hilton B e Schoof
was duet me z Lieschtel ächt versuume
A schloofe oder B s Schnee ruume
au eusi Fuessball-Nati duet das bloge
au die hei wirklich schweri froge
mues e Penalty root emol
A in oder B ächt näbes Goal
nur will mir heimlich in dr Nacht
uf em Friedhof uss e Grab hei gmacht
Lieschtler sy und erscht no Chrischte
syge mir schlimmi Rassischte
derby hei mir in das Grab aabe
s letscht z Lieschtel brauti Bier begrabe
salut ca vas bonjour bonsoir
c est francais erschti Primar
hello again i am very cool
it s early englisch in dr Schuel
he Mann voll geil und huerre krass
und das wärs Dütsch in jeder Klass