mir Schlümpfli chönnes fascht nit glaube
dr Papscht duet jetzt Kondom erlaube
und d Pille darf meh jetzt au neh
das het jo Wält no gar nie gseh
derfür het er do gits nüt z spotte
s Chindermache sträng verbotte
im e Moskauer Spital
lydet dr Jelzin e hölle Qual
e Top-Agent uss Amerika
het e Aschlag uff ihn ussgführt gha
drum het dr Jelzin au grund zum Chlage
dr Jack Daniels het ihn zämme gschlage
e grosses Vögeli und e Hass
sitze zäme im höche Gras
s Häsli frogt schüch und ohni Muet
isch dr Koch als Bischof guet
s Vögeli seit und will grad starte
do müen mir z erscht nüün Monet warte
dr Stadtkanal mir sy ganz baff
empfangt me jetzt in jedem Kaff
dr Märtplatz gsesch Dag y Dag uss
e sone Seich es isch e Gruus
oder s Trämmli gsesch das gits jo nit
wies ummefahrt – esone Schitt
und ghöre duesch derzue dr Ton
vom Basilisk das isch e Hohn
besser wer doch zu däm Scheiss
dr Rammelsänder Edelweiss
im Rothuus hets s isch allerhand
e knallig roti Plättliwand
mit chlyne Plättli rächts nach linggs
mir froge do was sell das Dings
es passt doch super ins Lieschtler Läbe
chlikariert und total dernäbe
d Polizei 2000 das isch e Clan
die lyde jetzt an Grössewahn
sy düen sogar s isch nit zum Säge
Chleider vom Willy Bogner träge
d Gradierige sy au ganz klar
Hauptinspekter und Kommissar
doch eine het se jetzt verrote
dä muess zur Zyt im Gfängnis brote
mir froge do ganz lieb und nett
sy d Tschamauche Hütte ächt komplett
d Blondinewitz sy jetzt dr Hit
d Blondine sy dumm das glaubsch jo nit
sy chönne nit lässe und nit schrybe
sy sy so blöd ohni z übertrybe
drum mache mir Schlümpfli grad e Wett
dass d Dreyfuss d Hoor halt doch gfärbt het